ភ្នំពេញ : នាថ្ងៃទី២៨ ខែឧសភា ឆ្នាំ២០២១ គ.ជ.ប បានប្រកាសនឹងរៀបចំការបោះឆ្នោតសាកល្បងជ្រើសរើសក្រុមប្រឹក្សាឃុំ សង្កាត់ ដោយប្រើប្រាស់ប្រព័ន្ធព័ត៌មានវិទ្យា (IT) នៅថ្ងៃទី២០ ខែមិថុនា ឆ្នាំ២០២១ ខាងមុខនេះដើម្បីសម្រួលការងារបោះឆ្នោតក្នុងបរិបទនៃបដិវត្តន៍ឧស្សាហកម្ម ៤.០ និងបរិបទនៃការរីករាលដាលនៃជំងឺកូវីដ-១៩។

នេះជាការគូសបញ្ជាក់របស់ លោក ឌឹម សុវណ្ណារុំ សមាជិកនិងជាអ្នកនាំពាក្យ គ.ជ.ប និងជាប្រធានដឹកនាំអង្គប្រជុំពិគ្រោះ យោបល់ជាមួយភាគីពាក់ព័ន្ធតាមប្រព័ន្ធអនឡាញ (Jitsi Meet) លើកទី១ស្តីពីការបោះឆ្នោតសាកល្បងជ្រើសរើសក្រុមប្រឹក្សាឃុំ សង្កាត់ ឆ្នាំ២០២១ ដែលបានប្រព្រឹត្តទៅនៅព្រឹកថ្ងៃទី២៨ ខែឧសភា ឆ្នាំ២០២១។

លោក ឌឹម សុវណ្ណារុំ បានឱ្យដឹងទៀតថាការរៀបចំការបោះឆ្នោតសាកល្បងនេះគឺជាការវាយតម្លៃអំពីប្រសិទ្ធភាពនៃការធ្វើទំនើបកម្មដំណើរការរៀបចំការបោះឆ្នោត ក្នុងក្របខ័ណ្ឌកំណែទម្រង់នៃការបោះឆ្នោតរបស់ គ.ជ.ប ដើម្បីបោះជំហានទៅការបោះឆ្នោតនាពេលអនាគតដោយប្រើ (IT)។

លោកបានបន្តថាសូមកុំមានការភាន់ច្រឡំការរៀបចំការបោះឆ្នោតសាកល្បងនេះមិនសំដៅដល់ការត្រៀមរៀបចំបោះឆ្នោតតាមអនឡាញនោះទេ ព្រោះគ្មានប្រទេសណាធ្វើនៅឡើយទេលើកលែងតែប្រទេសអេស្តូនី តែ១គត់ក្នុងពិភពលោក៕